Asnjë qeveri në botë nuk është plotësisht e përgatitur për ndryshimet që Inteligjenca Artificiale do të sjellë në shoqëri. Paralajmërimi vjen nga bashkëthemeluesi i Microsoft, Bill Gates, i cili në një intervistë për Reuters tha se qeveritë nuk po merren me këtë çështje në masën që duhet. Gates, i cili deri vonë ishte optimist për mundësitë që sjell Inteligjenca Artificiale, tashmë paralajmëron për rreziqet që lidhen me zhvillimin e saj të shpejtë. Sipas tij, IA mund të ketë ndikim të madh në tregun e punës, të krijojë rreziqe për sulme të mundshme dhe të sjellë një varësi të re nga “shoqëruesit” dixhitalë. “Qeveritë kanë mbetur shumë prapa në këtë çështje”, u shpreh Gates. Megjithatë, ai thekson se Inteligjenca Artificiale mund të sjellë përfitime të mëdha, veçanërisht për vendet dhe njerëzit më të varfër në botë. Për këtë arsye, Fondacioni Gates ka njoftuar se do të investojë të paktën 1 miliard dollarë gjatë dy viteve të ardhshme për të zgjeruar aksesin në Inteligjencën Artificiale. Fondet do të përdoren në fusha si arsimi, shëndetësia dhe bujqësia, ndërsa një tjetër synim është krijimi i bazave të të dhënave që do të ndihmojnë zhvillimin e modeleve të Inteligjencës Artificiale në gjuhë të ndryshme. Në veçanti, Gates sheh potencial të madh në sektorin e shëndetësisë, nga mbështetja e punonjësve shëndetësorë deri te zbulimi i barnave dhe vaksinave të reja.Por ai paralajmëron se qeveritë duhet të bashkëpunojnë për të shmangur rreziqet që mund të sjellë teknologjia. “IA është në një farë mënyre si një inteligjencë aliene. Ata janë këtu dhe ne më mirë të bëjmë atë që shohim të bëjnë në këto filma”, tha Gates. Sipas tij, sfida kryesore tani është që qeveritë të mos mbeten pas ritmit me të cilin po zhvillohet Inteligjenca Artificiale.