Gati 80 viktima ka bërë i nxehti në Indi, mbi 50 prej të cilëve vetëm gjatë tre ditëve të fundit: Autoritetet janë në alarm e nuk po dijnë si të përballen me përvëlimin që ka pllakosur disa rajone të vendit. 33 punëtorë vdiqën nga vapa vetëm në shtetin verior të Utar Pradeshit. Në mesin e viktimave, kishte edhe persona që ishin të angazhuar në zgjedhjet e përgjithshme, përfshirë zyrtarë dhe roje të sigurisë. 20 janë viktimat në Odisha. Ministria federale e Shëndetësisë pohoi se janë evidentuar me dhjetëra vdekje si pasojë e të nxehtit nga 1 marsi deri më 30 maj. Zakonisht, India zgjedhjet e saj të përgjithshme i mban në muajt prill dhe maj. Por këtë vit temperaturat kanë qenë rekord - mbi 45 gradë Celsius, e në disa zona edhe 50 gradë. Rajone të tëra po përjetojnë po ashtu mungesa të mëdha të ujit dhe energjisë elektrike, për shkak të rritjes së konsumit gjatë vapës. Shpresat tani janë po sërish tek natyra, pasi Departamenti Indian i Motit pretendon se temperaturat ka gjasa të bien në ditët në vijim, për shkak të fillimit të shirave që mendohet të mbërrijnë me sezonin e musonëve.