Gjykata Themelore e Prishtinës ka lënë një muaj paraburgim dy edukatoret e dyshuara për dhunën ndaj një fëmije 3-vjeçar në një çerdhe në Fushë-Kosovë. Ishin familjarët e 3-vjeçarit ata që publikuan në rrjetet sociale incizimet nga kamerat e sigurisë në çerdhen “Gëzimi Ynë” në Fushë Kosovë, ku shfaqen edukatoret duke ushtruar dhunë ndaj fëmijës. Prokuroria tha se e ka autorizuar policinë për nisjen e menjëhershme të hetimeve pas rastit të rëndë, ndërsa dy edukatoret do të mbahen në paraburgim Ato dyshohen për dy vepra penale “keqtrajtim gjatë ushtrimit të detyrës zyrtare ose autorizimeve publike” dhe “lëndim të lehtë trupor”, tha Prokuroria. Fëmija është dërguar për kryerjen e ekzaminimeve të nevojshme mjeko-ligjore. Do të jenë rezultatet e këtij raporti që do t’i japin përgjigje dyshimeve se të pandehurat e kanë tërhequr për krahu të dëmtuarin e mitur, në atë mënyrë që i kanë shkaktuar lëndime trupore. Sipas familjarëve që i kanë publikuar pamjet, 3-vjeçari është rrahur nga dy edukatore, duke pretenduar se në dhunë janë përfshirë edhe pastruesja dhe kuzhinierja e këtij institucioni. Ata thanë, po ashtu, se fëmija po përjeton “trauma të rënda psikike, nuk mund të flejë më dhe po përjeton ankth të madh”. Drejtori i Arsimit në Fushë Kosovë, Fatlum Berisha, tha për mediat se edukatoret që dyshohet të jenë përfshirë në këtë rast do të pezullohen nga puna pasi të përfundojë intervistimi në polici.