Ministri i Jashtëm i Gjermanisë, Johann Ëadephul, ka zhvilluar një vizitë zyrtare në Kiev, ku ka konfirmuar mbështetjen e plotë të Berlinit përballë ofensivës së ashpërsuar ruse. Vizita erdhi vetëm një ditë pasi një sulm rus me dron mbi një qendër tregtare të mbushur me njerëz në Ukrainën lindore la të paktën 16 civilë të vdekur .“Lufta brutale e agresionit e Rusisë nuk është zbutur në asnjë mënyrë,” deklaroi Ëadephul në një konferencë të përbashkët me homologun e tij ukrainas, Andriy Sybiga. “Përkundrazi, Putini madje e ka rritur intensitetin e luftës së tij. Ai po terrorizon qëllimisht civilët, duke sulmuar infrastrukturën civile me raketa dhe tufa dronësh”, tha ai. Sipas të dhënave të OKB-së, numri i civilëve të vdekur në Ukrainë përgjatë vitit 2026 ka kapur nivelet më të larta që nga muajt e parë të pushtimit në vitin 2022. Për të lehtësuar krizën humanitare, Berlini zyrtar njoftoi dy financime të reja të menjëhershme: 50 milionë euro ndihmë humanitare shtesë, e cila do të kanalizohet përmes agjencive të OKB-së dhe OJQ-ve për të mbështetur banorët në zonat pranë vijës së frontit dhe 10 milionë euro kontribut në një fond të NATO-s, i cili synon të forcojë dhe të mbrojë sistemet e energjisë së Ukrainës nga sulmet me dronë. Ëadephul u prit në një takim edhe nga Presidenti Volodymyr Zelensky, me të cilin diskutoi përgatitjet urgjente përpara dimrit, kur Moska pritet të rifillojë sulmet masive mbi rrjetin energjetik. Ukraina po vuan aktualisht nga një mungesë e theksuar e raketave interceptuese Patriot. Ky ngadalësim i furnizimeve vjen pasi Shtetet e Bashkuara u përfshinë në një konflikt ushtarak me Iranin në shkurt të këtij viti, duke devijuar sistemet e tyre të mbrojtjes drejt Lindjes së Mesme. Lidhur me këtë pikë, ministri gjerman bëri me dije se ka nisur bisedimet me vendet evropiane dhe se javën e ardhshme do ta diskutojë këtë çështje, si dhe përpjekjet e ngecura të paqes, direkt me Sekretarin e Shtetit të SHBA-së, Marco Rubio. Sakaq në Kiev Zelensky ka pritur edhe të dërguarin special të SHBA-së Keith Kellogg në Kiev me të cilin tha se pati një takim të mirë të fokusuar tek mbrojtja ajrore. “Diskutuam masa konkrete për të rritur potencialin ekonomik të Ukrainës, për të zgjeruar programet e mbështetjes për ukrainasit dhe për të rritur prodhimin tonë vendas të armëve”, u shpreh Zelensky