Pas një seance të gjatë, Senati i SHBA-së konfirmoi me një votim të ngushtë 50 pro dhe 49 kundër emërimin e Todd Blanche në krye të Departamentit të Drejtësisë. Ky hap u mundësua nga shumica republikane, ndonëse dy senatorët e tyre Susan Collins dhe Lisa Murkoëski, iu bashkuan demokratëve duke votuar kundër konfirmimit të tij. Megjithatë për të bindur republikanët e tjerë skeptikë Blanche pranoi të hiqte dorë plotësisht nga fondi 1.8 mln dollarë, i propozuar fillimisht nga Trump për të financuar ata që Shtëpia e Bardhë i quan "viktima të ndjekjeve penale të politizuara", sic cilësohen protestuesit e sulmit të 6 janarit në Kapitol). Po ashtu u ndryshua rrënjësisht Propozimi i jashtëzakonshëm që mbronte Donald Trumpin nga auditimet e taksave. Marrëveshja e re përcakton se ky imunitet për presidentin, dy djemtë e tij të mëdhenj dhe "Organizatën Trump" do të zbatohet vetëm në mënyrë prapavepruese për vitet e kaluara tatimore, duke mos pasur asnjë efekt mbi deklarimet e tyre të ardhshme. Todd Blanche nuk është një emër i panjohur për publikun. Përpara se të merrte fillimisht drejtimin e përkohshëm të Departamentit të Drejtësisë pas shkarkimit të Pam Bondi në prill, ai shërbeu si avokati kryesor privat i Donald Trump në disa prej betejave të tij më të mëdha penale. Blanche udhëhoqi ekipin ligjor të Trump në gjyqin e Nju Jorkut për çështjen e pagesave ndaj Stormy Daniels, si dhe në dy çështjet federale të ngritura nga këshilltari special Jack Smith, për dokumentet e klasifikuara dhe përmbysjen e zgjedhjeve të vitit 2020, të dyja të rrëzuara pasi Trump fitoi zgjedhjet presidenciale. Opozita demokrate e ka kundërshtuar me forcë këtë lëvizje, duke akuzuar Shtëpinë e Bashkë se po e shndërron qëllimisht organin më të lartë të drejtësisë në një armë politike personale. Me këtë konfirmim, Trump vulos kontrollin e tij të drejtpërdrejtë mbi agjencitë federale ligjzbatuese, duke shënuar një epokë të re të funksionimit të institucioneve të pavarura në SHBA.