Një ngjarje e rëndë është shënuar mbrëmjen e së hënës në aksin Fier–Dimal, në dalje të fshatit Kutalli, ku një 45-vjeçar i shoqëruar nga policia dyshohet se ka marrë armën e shërbimit të një efektivi dhe e ka plagosur gjatë transportimit drejt Komisariatit të Kuçovës. Sipas të dhënave paraprake, shtetasi Zamir Skënderi, 45 vjeç, banues në Kuçovë dhe i njohur për precedentë të mëparshëm penalë, ishte arrestuar në Fier për prishje të qetësisë publike. Burime nga policia bëjnë me dije se gjatë mesditës ai ishte konfliktuar edhe në ambientet e Prokurorisë së Fierit dhe më pas ishte shoqëruar nga shërbimet e Policisë së Fierit. Për shkak se 45-vjeçari ishte banues në Kuçovë, Policia e Fierit kishte kërkuar mbështetjen e Komisariatit të Policisë Kuçovë për transportimin e tij. Tre efektivë policie ishin nisur për ta marrë dhe po e transportonin me mjetin e policisë drejt Kuçovës, kur ngjarja ka ndodhur brenda patrullës. Gjatë rrugës, në dalje të fshatit Kutalli, dyshohet se mes Skënderit dhe efektivit të policisë Arsen Toska, 20 vjeç, i cili ndodhej në sediljen e pasme së bashku me të shoqëruarin, ka nisur një konflikt. Në ato momente, 45-vjeçari dyshohet se i ka marrë armën e shërbimit policit dhe ka qëlluar një herë në pjesën e kofshës, duke e plagosur. Menjëherë kanë ndërhyrë dy punonjësit e tjerë të policisë që ndodheshin në automjet, duke neutralizuar dhe arrestuar autorin e dyshuar, teksa ai tentonte të largohej. Efektivi i plagosur është transportuar fillimisht drejt Spitalit të Beratit, ku ka marrë ndihmën e parë mjekësore, ndërsa më pas është dërguar në Spitalin e Traumës në Tiranë për trajtim të specializuar. Burime paraprake bëjnë me dije se Zamir Skënderi njihet edhe si konsumator i lëndëve narkotike, ndërsa hetimet vijojnë për të sqaruar dinamikën e plotë të incidentit të ndodhur brenda mjetit të policisë.