Kancelari austriak, Sebastian Kurz, ka mbledhur në Vjenë në një samit të kryesuar prej tij krerë të Ballkanit Perëndimor. Kosova përfaqësohet atje nga kryeministri Albin Kurti, Shqipëria nga ministrja e Infrastrukturës dhe Energjetikës, Belinda Balluku, Serbia nga kryeministrja Ana Bërnabic, Bosnja nga kryesuesi i Këshillit të Ministrave, Zoran Tegeltija, Maqedonia e Veriut nga kryeministri Zoran Zaev dhe Mali i Zi nga kryeministri Zdravko Krivokapic, thotë REL. Në samit po merr pjesë edhe përfaqësuesi i posaçëm i Bashkimit Europian për dialogun mes Kosovës dhe Serbisë, Mirosllav Lajçak. Nga sa pohoi vetë shefi i ekzekutivit austrial, në samit do të garantohen vendet e rajonit se do të kenë mbështetje të plotë për reformat në rrugën drejt BE-së si dhe për luftën kundër pandemisë së koronavirusit. Do të flitet gjithashtu edhe për luftën e përbashkët kundër emigracionit të paligjshëm, shkroi Kurz në Twitter. Vetëm pak ditë më parë, përfundoi në Bruksel samiti i vendeve anëtare të NATO-s, i pari me prani fizike që nga viti 2018 për shkak të pandemisë së koronavirusit. Aty u theksua vec të tjerash se Ballkani Perëndimor është një rajon me rëndësi strategjike për NATO-n e cila mbetet e përkushtuar fuqishëm ndaj aspiratave euro-atlantike të vendeve të rajonit dhe do të shtojë përpjekjet për të zgjeruar dialogun politik dhe bashkëpunimin praktik në mënyrë që të mbështeten reformat, e të promvohet paqja dhe siguria rajonale.