Hunter Biden, djali i presidentit të SHBA-së Joe Biden pranoi fajësinë për akuzat e evazionit fiscal, e kjo vetëm disa muaj pasi u shpall fajtor në një tjetër proces gjyqësor nën akuzat për shkelje të ligjit të armëmbajtjes. Mea culpa e tij erdhi disa orë para se të niste zgjedhja e juries në Los Anxhelos që supozohej të shqyrtonte rastin në ngarkim të tij mbi akuza federale për një skemë katërvjeçare që kishte për ëllim shmangien e pagesës së të paktën 1.4 milionë dollarëve në taksa. Hunter ishte në sallën e gjyqit me bashkëshorten e tij, Melissa Cohen Biden dhe i rrethuar nga agjentë të Shërbimit Sekret. Masa e dënimit është caktuar të jepet në 16 dhjetor. Sipas gjykatësit Gjykatësi Mark Scarsi, djali i shefit btë Shtëpisë së Bardhë rrezikon deri në 17 vjet burg dhe një gjobë deri në 450 mijë dollarë. Fillimisht, Hunter ishte deklaruar i pafajshëm për akuzat për evazion fiskal nga viti 2016 deri në 2019 dhe avokatët e tij kishin thënë se do të argumentonin se ai nuk ka vepruar "me dashje" ose me qëllim për të shkelur ligjin, pjesërisht për shkak të varësisë nga droga dhe alkooli. Vitin e kaluar dështoi një marrëveshje paragjyqësore e Hunter Bidenit me prokurorët, sipas së cilës, ai binte dakord të pranonte fajësinë për shmangie të pagimit të taksave, dhe Departamenti i Drejtësisë, në shkëmbim, nuk do ngrinte akuzën për armëmbajtje pa leje. Marrëveshja nuk u pranua nga gjykatësi, që vuri në dyshim disa aspekte të pazakonta të saj. Gjykatësi Scarsi, i cili është emëruar nga ish-presidenti Donald Trump, vendosi disa kufizime mbi atë që anëtarët e jurisë do të lejoheshin të dëgjonin për ngjarjet traumatike që familja, miqtë dhe avokatët e Hunter Biden-it thonë se çuan në varësinë e tij nga droga.