Parlamenti i Hungarisë miratoi sot ndryshimet kushtetuese që synojnë personat LGBTQ+ dhe ato që qeveria i quan “rrjetet e presionit politik të financuara nga jashtë” që minojnë sovranitetin e vendit. Amendamentet kushtetuese janë pjesë e fushatës politike të Viktor Orban për të rritur bazën e tij të votuesve dhe gjithashtu për të joshur votat nga e djathta ekstreme, thanë disa analistë. Orban është zotuar të godasë fondet e huaja të mediave të pavarura dhe organizatave joqeveritare në Hungari, ndërkohë që do të përshkallëzojë fushatën e tij politike kundër komuniteteve LGBTQ+. Amendamentet kushtetuese, të cilat kaluan lehtësisht të hënën për shkak të shumicës dhe me mbështetjen e ligjvënësve të ekstremit të djathtë, theksojnë mbrojtjen e zhvillimit fizik dhe moral të fëmijëve mbi të gjitha të drejtat e tjera. Amendamenti kaloi me 140 vota pro dhe 21 kundër. “Ligjvënësit e qeverisë e shohin këtë ndryshim si një mbrojtje kushtetuese kundër ndikimeve ideologjike që ata argumentojnë se kërcënojnë mirëqenien e fëmijëve, veçanërisht në kontekstin e ngjarjeve si paradat e Krenarisë”, tha zëdhënësi i qeverisë përpara votimit. Ndryshimet parashikojnë gjithashtu në kushtetutë që Hungaria njeh vetëm dy gjini, mashkull dhe femër, në përputhje me axhendën kristiane-konservatore të Orbanit. Amendamenti i së hënës mbështet legjislacionin e miratuar më 18 mars që ndalon marshimin vjetor të Krenarisë, duke kufizuar lirinë e grumbullimit dhe duke shkaktuar protesta kundër ndryshimeve të ndjekura me shpejtësi nga partia e Orbanit. Kryeministri nacionalist Viktor Orban, në pushtet që nga viti 2010, përballet me zgjedhjet në 2026 me ekonominë në vështirësi dhe një parti të re opozitare që paraqet sfidën më të fortë deri më tani për qeverisjen e tij.