Dy pushues humbën jetën këtë të premte në plazhe. Në Durrës, në plazhin e Porto Romano, një 68-vjeçar shfaqi probleme shëndetësore gjatë momentit që po futej në ujë. Ai u dërgua me urgjencë drejt spitalit nga ana e familjarëve të tij por pavarësisht ndihmës mjekësore nuk mundi të mbijetojë. Shkak paraprakisht dyshohet se 68-vjeçari pësoi arrest kardiak. Ndërkohë ngjarja tjetër e rëndë ndodhi në plazhin e Tales në Lezhë, aty ku një 52-vjeçar nga Kamza, ndërroi jetë gjatë transportimit për në spital. Edhe në këtë rast dyshohet se viktima pësoi arrest kardiak. Kjo pasi, sipas policisë, ai nuk u ndje mirë sapo ra në kontakt me ujin në anë të detit. Pavarësisht ndihmës së parë të dhënë nga roja bregdetare dhe pushuesit, 52-vjeçari humbi jetën. Ndërkohë për të dyja rastet, policia nisi hetimet.