Një aksident fatal në Tiranë i ka marrë jetën babait të ministres së Shtetit për Administratën Publike dhe Antikorrupsionin, Adea Pirdeni. 87-vjeçari Luan Pirdeni ndërroi jetë te Spitali i Traumës, në kryeqytet, pak orë pasi u përplas nga një motor. Ngjarja e rëndë ndodhi te kryqëzimi i rrugës “Bardhyl” me rrugën “Kongresi i Manastirit”, në Tiranë, ku 87-vjeçari u përplas teksa lëvizte me biçikletë. Ai u dërgua me urgjencë në spital, por nuk mundi t’i mbijetojë plagëve të rënda. Policia arrestoi autorin e aksidentit, 31-vjeçarin Sejdi Milla, dhe vijon hetimet për zbardhjen e plotë të ngjarjes. Gjatë mbrëmjes së të enjtes një tjetër aksident rrugor u regjistrua në aksin Lezhë-Milot, me pasojë plagosjen e tre personave. Një automjet humbi kontrollin gjatë lëvizjes, duke lënë të plagosur tre personat që udhëtonin në mjet, njëri prej tyre në gjendje më të rëndë.