Një ngjarje e rëndë ka tronditur Francën. Pesë foshnja të porsalindura janë gjetur të pajeta brenda një banese në qytetin Orange, në juglindje të vendit. Sipas mediave lokale, trupat e foshnjave u gjetën të vendosura brenda disa kutive kartoni në shtëpinë e një çifti, shkruajnë mediat. Rasti është zbuluar nga autoritetet, të cilat kanë nisur hetimet për të sqaruar rrethanat e vdekjes së të porsalindurve dhe për të përcaktuar se si ka ndodhur ngjarja. Mediat raportojnë se gruaja e çiftit ka sjellë në jetë një djalë të shëndetshëm në orët e fundit, një detaj që ka shtuar më tej misterin rreth ngjarjes. Policia dhe prokuroria franceze pritet të japin më shumë informacion pas përfundimit të veprimeve të para hetimore. Për momentin, nuk janë bërë publike detaje të tjera mbi identitetin e personave të përfshirë apo motivet e mundshme.