Të paktën 146 persona humbën jetën nga zjarri shkatërrues që përfshiu ndërtesat e banimit në Hong Kong, të mërkurën. Policia njoftoi numrin e të vdekurve të dielën, duke paralajmëruar se nuk mund të përjashtohet rritja e tyre, pasi 150 persona rezultojnë ende të zhdukur, ndërsa nga flakët mbetën edhe 79 të plagosur. Shtatë nga tetë blloqet e kullave në kompleksin e banesave Wang Fuk Court në lagjen veriore Tai Po u dogjën me shpejtësi. Autoritetet e Hong Kong shpallën tri ditë zie kombëtare, duke filluar nga e shtuna deri të hënën, ndërsa mijëra njerëz u mblodhën në vendngjarje për të vajtuar viktimat. Njerëz që prisnin në radhë deri në 2 kilometra iu drejtuan vendin ku ndodhi tragjedia, duke vendosur lule dhe shënime të shkruara me dorë. Zyrtarët mbajtën tre minuta heshtje para se të fillonin periudhën e zisë, dhe flamujt e Kinës dhe Hong Kongut valëviten në gjysmë shtizë. Ky ishte zjarri më vdekjeprurësi në Hong Kong në më shumë se 70 vjet, dhe numri i të vdekurve është rritur çdo ditë, ndërsa zyrtarët po punojnë për të identifikuar trupat. Tetë persona janë arrestuar me dyshimin për korrupsion gjatë rinovimeve që kishin ndodhur në kulla, ndërsa tre të tjerë u ndaluan me akuza për vrasje të paqëllimshme. Zjarri - i cili u përhap shpejt si lart ashtu edhe midis blloqeve - u shua plotësisht vetëm të premten në mëngjes, rreth 40 orë pasi filloi, dhe u deshën më shumë se 2000 zjarrfikës për ta vënë nën kontroll.