Mbrëmjen e së martës, një grup banorësh të zonës së Spitallës, ku ndodhi aksidenti tragjik i së dielës u mblodhën në një protestë të heshtur para bashkisë së Durrësit. Ata ndezën qirinj në shkallët e bashkisë në homazh të dy jetëve të humbura. Në heshtje të plotë, pa pankarta dhe pa deklarata publike, pjesëmarrësit përcollën mesazhin e tyre, shqetësimin për mungesën e sigurisë në rrugë. Ky reagim vjen pas një tjetër akti simbolik të zhvilluar gjatë paradites, kur pranë Drejtorisë së Policisë së Durrësit u vendos një kurorë me lule me mesazhin “Merrni masa”. Ngjarja e rëndë, ku humbën jetën dy fëmijë dhe u plagos një tjetër, ka tronditur komunitetin e zonës dhe të gjithë Durrësin. Të afërmit dhe banorët kërkojnë jo vetëm drejtësi, po dhe ndërhyrje nga autoritetet vendore dhe policia për rritjen e sigurisë dhe përmirësimin e infrastrukturës në zonë, me qëllim parandalimin e aksidenteve të ngjashme. Ndërkohë, një marshim tjetër, më masiv, pritet të mbahet pasditen e së mërkurës.