Në nderim të rreshterit të vrarë në Kosovë, Afrim Bunjaku u zhvilluan homazhe edhe në Tiranë. Një nismë kjo e gazetarit të Top Channel, Marin Mema që thirri qytetarët në sheshin “nënë tereza” për të kujtuar figurën e efektivit të policisë që ra në krye të detyrës gjatë sulmit të zhvilluar nga një grup I armatosur serbësh. Marshime të ngjashme u zhvilluan edhe në qytete të tjera të vendit por dhe në Shkup të Maqedonisë së Veriut. Ndërkohë në Prishtinë homazheve iu bashkuan edhe politikanë të lartë shqiptar krahas atyre të Kosovës. Për nder të policit Afrim Bunjaku edhe në sheshin “times square” të nju Jorkut u shfaq stema e policisë së kosovës. “Faleminderit heronjve tanë, Policisë së Kosovës. Rroftë Kosova Republikë”, ishte mbishkrimi në foton ku shihej logoja e Policisë së Kosovës. Nisma e një shqiptari nga Mitrovica nuk përfundonte këtu, por vazhdonte dhe me një fotografi tjetër ku shihej logo e UÇK-së e shkruhej “Të vdesësh për atdhe është sikur të rilindësh përsëri – Afrim Bunjaku”.