Banka Qendrore e Holandës konfirmoi zhvendosjen e dhjetëra tonëve ar nga Amerika e Veriut drejt Londrës, duke përmendur rritjen e tensioneve dhe pasigurisë gjeopolitike. Sipas DNB, 86 tonë flori janë tërhequr nga Shtetet e Bashkuara dhe Kanadaja gjatë një operacioni kompleks që zgjati disa muaj. Rezervat tashmë ruhen pranë Bankës së Anglisë, ku floriri mund të tregtohet më lehtë në rast krizash. Presidenti i bankës, Olaf Sleijpen, deklaroi se ky veprim ishte “i nevojshëm për të forcuar qëndrueshmërinë dhe gatishmërinë” e vendit. Transferimi u krye mes muajve mars dhe gusht. Rreth 27 tonë ar u transportuan fizikisht nga Nju Jorku dhe Otava drejt Holandës, ndërsa një sasi e ngjashme u zhvendos më pas në Londër. Pjesa tjetër e operacionit u realizua përmes shitjes së arit në Nju Jork dhe riblerjes së tij në tregun londinez. DNB nuk specifikoi se cilave zhvillime i referohej me termin “pasiguri gjeopolitike”, por vendimi vjen në një periudhë tensionesh të forta ndërkombëtare, përfshirë luftën e vazhdueshme të SHBA-së me Iranin dhe përplasjet tregtare mes Uashingtonit dhe Otavës. Sipas Bankës Qendrore Hollandeze, ari i depozituar në Bankën e Anglisë konsiderohet ndër më të lehtët për t’u tregtuar në botë dhe, për këtë arsye, është më i disponueshëm në rast të një krize. Pas këtij operacioni, pjesa e rezervave holandeze të arit të mbajtura në Londër është rritur nga 18 në 32,1%, ndërsa Holanda vazhdon të mbajë rreth 30,8% të arit të saj brenda territorit kombëtar. Në fund të vitit 2025, rezervat totale të arit të Holandës arrinin në 612,4 tonë, me një vlerë prej rreth 72,2 miliardë eurosh.