Të përkulur mbi krevatin e foshnjës së sapolindur, Kristina Rapti-Tzelepi, 54 vjeç, dhe bashkëshorti i saj nuk fshehin dot emocionet. Vetëm pak muaj më parë, në tetorin e vitit të kaluar, çifti kishte humbur djalin e tyre 21-vjeçar në një aksident rrugor. Tashmë ,ata në një maternitet të Athinës, mbajnë në krahë vajzën e tyre, e cila erdhi në jetë nga një embrion i ngrirë për më shumë se 22 vjet.Embrioni ishte ruajtur që nga viti 2004, pas përpjekjes së parë të çiftit me fekondim të asistuar, nga e cila kishte lindur edhe djali i tyre, Giorgos. Pas humbjes së tij, Kristina dhe bashkëshorti vendosën të përdornin një nga embrionet që kishin mbetur të kriokonservuara. Meqë nuk donim të hiqnim dorë nga jeta, vendosëm t’i jepnim vetes një shans të dytë, të bënim një fillim të ri, të sillnim një jetë të re në shtëpinë tonë dhe të mos e linim atë të mbyllej. Koha ishte e kufizuar, pasi legjislacioni grek lejon procedurat e riprodhimit të asistuar deri në moshën 54-vjeçare. Embrioni u transferua në dhjetor të vitit 2025 dhe vajza lindi në Athinë me peshë 3 kilogramë e 490 gramë. Sipas gjinekologut Kostas Pantos, periudha e kriokonservimit prej 22 vitesh, 5 muajsh dhe 23 ditësh është më e gjata e regjistruar ndërkombëtarisht që ka çuar në lindjen e një fëmije të shëndetshëm. Çifti e quajti vogëlushen Georgia, në nder të vëllait të saj të ndjerë, Giorgos. Babai thotë se ardhja e saj solli sërish “oksigjen” në jetën e tyre dhe siç e përshkruan ai ,i ndihmoi të dalin nga, errësira e thellë pas humbjes së djalit.