Gjykata e Durrësit ka lënë në burg 57-vjeçarin Nikoll Radaçi i cili në gjendje të hequr përplasi me makinë tre fëmijët në Durrës, dy prej të cilëve fatkeqësisht humbën jetën. Para togave të policisë, kur është arrestuar ai ka dhënë versionin e tij të dëshmisë, duke thënë se mjeti doli nga rruga sepse tentoi të shmangte një tjetër mjet që doli nga rrugica, mëson Top Channel. “Rreth orës 14.00 kam dalë nga shtëpia bashkë me mjetin dhe do të shkoja të merrja një vegël pune tek një shoku im. Unë po drejtoja automjetin në korsinë e djathtë, papritur nga një rrugicë lagjeje doli një automjet, unë devijova për të shmangur këtë automjet dhe kam përfunduar sipër trotuarit të anës së majtë të rrugës. Pasi hipa mbi trotuar, jam përfshirë në aksident me disa fëmijë që ndodheshin mbi trotuar. Automjeti që unë po drejtoja nuk ka arritur të ndalojë dhe kam shkuar disa metra më përpara. Unë dola nga makina dhe kam shkuar tek një dyqan aty pranë ku punonjësve të dyqanit ju kam thënë të njoftojnë policinë pasi kam bërë aksident. Unë kam qëndruar tek dyqani derisa erdhi policia dhe më mori për në komisariat”, ka deklaruar i akuzuari gjatë marrjes në pyetje, deklaratë që është lexuar gjatë fjalës së prokurores sot në seancë. Të dhënat tregojnë se nga verifikimet e historikut të drejtuesit të automjetit rezulton se ky shtetas është ndëshkuar më parë për shkelje të rregullave të qarkullimit rrugor, konkretisht për parakalim të gabuar, në vitin 2020, dhe për tejkalim të shpejtësisë, dy herë, me pezullim të lejes së drejtimit nga 1 muaj, në vitin 2022. Banorët e zonës e përshkruajnë si një drejtues problematik, autorin e dyshuar, por dhe persona të tjerë duke ngritur shqetësime për mungesën e kontrollit dhe sigurisë në rrugët e lagjeve. Nikoll Radaçi në komunitet njihej me emrin “Bisha e rrugës”, nofkë që ia kishte vënë vetes. Banorët kërkojnë masa më të forta ndaj drejtuesve që qarkullojnë në gjendje të dehur, por edhe më shumë vëmendje për krijimin e hapësirave të sigurta për fëmijët. Kjo tragjedi ka kthyer sërish në fokus jo vetëm përgjegjësinë individuale në përdorimin e rrugës, por edhe problemet e sigurisë rrugore në zonat e banuara.