Ndërsa Vangjel Tavo është tashmë i zgjedhuri i qytetarëve për të drejtuar bashkinë e Himarës, opozita nuk e pranon humbjen. Koalicioni Bashkë Fitojmë ankimoi në KQZ rezultatin e zgjedhjeve të 4 gushtit, ku Tavo mundi me mbi 1500 vota më shumë kandidatin kundërshtar, Petro Gjikuria. Në ankimimin zyrtar drejtuar KQZ, opozita kërkon shpalljen e pavlefshme të votimeve në 36 qendrat e votimit në Himarë. “Koalicioni Bashkë Fitojmë, ka ardhur në dijeni të fakteve dhe ka siguruar prova të mjaftueshme lidhur me problematika dhe parregullsi të rënda të procesit zgjedhor të ndodhura në të gjitha Qendrat e Votimit (36-QV) të Bashkisë Himarë” Në ankimimin e bërë, koalicioni opozitar ngre disa pretendime që sipas tyre i bëjnë këto zgjedhje të pavlefshme. Njëra prej çështjeve është mos lejimi për të votuar personat që u kishin skaduar kartat e identitetit. Më tej problem i ngritur janë edhe personat e paautorizuar në qendrat e votimit. “Mbi të gjitha, problemi madhor në zgjedhjet e 4 gushtit në Himarë ishte pamundësimi i votimit për zgjedhësit që kishin dokumente identifikimi të skaduara dhe ky numër ishte mbi 6000 votues në Bashkinë e Himarës, ku në total rezultoi se votuan rreth 8500 zgjedhës”. Në radhët e opozitarëve që e ka njohur deri tani Vangjel Tavon si kryetar të Bashkisë është ish-kandidati Fredi Beleri që po vuan dënimin me burg për korrupsion, i cili nëpërmjet një letre i kërkoi kryebashkiakut të ri që të ndërtojë një gjimnaz grek në Himarë.