Një ushtar francez u vra dhe tre të tjerë u plagosën në një sulm ndaj paqeruajtësve të OKB-së në Libanin jugor, njoftoi Presidenti Emmanuel Macron, duke deklaruar se përgjegjës për ngjarjen mund të jetë Hezbollahu, grupi i shpallur terrorist nga Shtetet e Bashkuara, që po lufton në krah të Iranit. “Kombi përulet me respekt dhe shpreh solidaritetin e tij me familjet e ushtarëve tanë dhe të gjithë ushtarëve tanë që po punojnë për paqen në Liban. Gjithçka na bën të besojmë se Hezbollahu është përgjegjës për këtë sulm. Franca kërkon që autoritetet libaneze të arrestojnë menjëherë autorët dhe të marrin përsipër përgjegjësitë e tyre”, u shpreh kreu i shtetit francez. Presidentja libaneze dënoi sulmin ndaj paqeruajtësve francezë dhe premtoi të arrestojë ata që janë përgjegjës. Nga ana e saj, ministrja franceze e Forcave të Armatosura, Catherine Vautrin, tha se paqeruajtësi francez që u vra të shtunën në Liban u “zu në pritë” dhe iu nënshtrua “zjarrit të drejtpërdrejtë”. Rreshteri francez u zu në pritë nga një grup i armatosur në një distancë shumë të afërt. Ndërkohë, Forca e Përkohshme e Kombeve të Bashkuara në Liban (UNIFIL) dënoi atë që e përshkroi si një “sulm të qëllimshëm ndaj paqeruajtësve”, pasi një nga personeli i saj u vra dhe tre të tjerë u plagosën në një sulm nga një grup i armatosur jo-shtetëror, ndërsa ata po përpiqeshin të pastronin eksplozivë në Libanin jugor. “UNIFIL ka nisur një hetim për të përcaktuar rrethanat e këtij incidenti tragjik”, tha UNIFIL në një deklaratë.