Udhëheqësi i Hezbollahut, Naim Qassem, deklaroi se organizata e tij kundërshton në mënyrë kategorike çdo negociatë të drejtpërdrejtë mes Libanit dhe Izraelit, duke i cilësuar ato si një “devijim të rrezikshëm”. Në një deklaratë Qassem theksoi se është përgjegjësi e qeverisë libaneze të shmangë një “gabim të rrezikshëm” që, sipas tij, mund ta çojë vendin në një cikël të ri paqëndrueshmërie. “Ne refuzojmë kategorikisht të negociojmë drejtpërdrejt me Izraelin”, u shpreh ai, duke shtuar se këto negociata “janë sikur të mos ekzistojnë dhe nuk na shqetësojnë në asnjë mënyrë”. Qassem nënvizoi gjithashtu se organizata do të vazhdojë atë që e quan “rezistencë” për mbrojtjen e Libanit. Ndwrkohw Ushtria izraelite njoftoi se një nga ushtaret u vra “gjatë luftimeve” në jug të Libanit. Izraeli dhe Hezbollahu, i mbështetur nga Irani, akuzojnë njëri-tjetrin për shkelje të marrëveshjes. Hezbollahu hodhi poshtë akuzat e kryeministrit izraelit Benjamin Netanyahu, duke deklaruar se sulmet e tij ndaj objektivave izraelite janë “një përgjigje legjitime ndaj shkeljeve të vazhdueshme të armëpushimit nga armiku që nga dita e parë”. Netanyahu tha se veprimet e Hezbollahut po rrezikojnë armëpushimin mes Izraelit dhe Libanit, duke u zotuar se do të godasë “fuqishëm” grupin e mbështetur nga Irani. Media zyrtare libaneze raportoi se ushtria izraelite nisi sulme në jug të vendit të dielën, pasi kishte lëshuar paralajmërime evakuimi për shtatë zona, pavarësisht armëpushimit me Hezbollahun.