Udhëheqësi i grupit militant Hezbollah, Sayyed Hassan Nasrallah paralajmëroi të premten se zgjerimi i konfliktit në Lindje të Mesme është një mundësi reale. Hezbollahu është në një “betejë të vërtetë” me Izraelin dhe “të gjitha opsionet janë në tryezë”, tha ai në fjalimin e tij të parë që nga fillimi i konfliktit Izrael-Hamas. Ai fajësoi Shtetet e Bashkuara për luftën në Gazë dhe numrin e lartë të viktimave civile dhe tha se ulja e tensioneve në Rripin e Gazës është qenësore për parandalimin e një lufte rajonale. Hezbollahu, organizatë e shpallur terroriste nga Shtetet e Bashkuara, mbështetet nga Irani. Që kur ka filluar lufta e Izraelit ndaj Hamasit, Hezbollahu ka përshkallëzuar sulmet ndaj forcave izraelite, duke detyruar Izraelin të mbajë forca në veri, në kufi me Libanin, dhe të mos i dërgojë ato në jug, në Rripin e Gazës. Shtëpia e Bardhë tha sot se Hezbollahu nuk duhet të shfrytëzojë konfliktin në Izrael. “Shtetet e Bashkuara nuk duan që konflikti të zgjerohet në Liban,” tha një zëdhënës. Pamjet: AFP