Të dhënat personale vijojnë të marrin arratinë mbasi në ditën e tretë të skandalit u publikuan targat e makinave dhe pronësia e tyre, megjithatë për prokurorinë zbulimi i punonjësve që shpërdoruan detyrën është çështje kohe. Kryeprokurorja e Tiranës Elisabeta Imeraj garanton hetime të shpejta. Duke u bazuar tek provat që kanë mbledhur grupi i hetimit është i bindur se nuk bëhet fjalë për hakerim nga jashtë sistemit, por nga hapja e rubinetit të të dhënave nga punonjës të institucioneve nën hetim. Gjatë ditës një grup hetuesish mbas sekuestrove , kanë vijuar marrjen në pyetje të punonjesve shtetërore pranë AKSHI-t, Institutit të sigurimeve shoqërore dhe tatimeve. Por me gjithë dritëhijet nga njëra anë dhe rrëfimeve interesante nga ana tjetër, shpresa e vetme mbetet gjurmimi i logimeve. Sidomos këto tre ditë të shpërndarjes së të dhënave personale që duhet të mbroheshin me ligj, pyetja kush janë përgjegjësit i adresohet drejtësisë.