Gjykata e Posacme me kërkesë së SPAK ka firmosur 9 urdhër arreste të tjera për dosjen e serave të kanabisit që u zbuluan në Berat dy vite më parë, ku ishin të përfshirë edhe zyrtarë të lartë të policisë. Me marrjen në dorëzim të dosjes, SPAK mundi të identifikojë financuesit dhe organizatorët e serave me kanabis, sipërmarrje kriminale në të cilën punonin dhe 95 gra. Hetuesit e BKH-së nisën zbatimin e urdhërarresteve një ditë më parë, ndërkohë që kanë arrestuar 6 persona dhe kanë shpallur në kërkim tre të tjerë. Në pranga për serat me kanabis kanë rënë sadetin Hasaj ,Lulezim Bushataj, Mustaf Manej ,Suad Smakaj ,Arben Vrapi DHE Adiol Çifliku. Këta shtetas me origjinë nga Malësia e Madhe Kuçova dhe Berati kanë vepruar si një grup i strukturuar kriminal për marrjen me qira të serave, ngritjen e infrastrukturës për kultivimin e bimëve narkotike si dhe rekrutimin e punëtoreve, kryesisht femra. Sipas njoftimit të Prokurorisë së Posacme, edhe këtë të enjte janë ushtruar kontrolle nga policia në banesat e disa prej shtetasve të arrestuar apo të shpallur në kërkim, ndërkohë që në banesën e njërit prej të hetuarve më parë, u gjetën dhe u sekuestruan 30 kubikë me fidanë kanabisi dhe fara kanabisi të kultivuara në ambient të mbyllur brenda njësisë së banimit, në katin e tretë, ku kishte instalime elektrike, llampa dhe mushama reflektuese. Zbulimi i datës 11 nëntor 2022 në fshatin Rërëz të Beratit, ku u gjetën të ngritura 4 sera të mbyllura me plastmas, si dhe mjete e pajisje që ndihmonin në kultivimin e kanabisit thuajse shkriu komisariatin e Beratit, për drejtuesit e të cilit pati shkarkime dhe masa disiplinore.