Vrasja e 65-vjeçarit Viktor Bardhi, alias Marku, në Ndërfushas të Mirditës vijon të mbetet pa autorë të dyshuar, ndërsa hetuesit po analizojnë pamjet e kamerave të sigurisë dhe lëvizjet e mundshme të personave të përfshirë në ngjarje. Deri në këtë fazë të hetimit janë shoqëruar rreth 10 persona, mes tyre edhe persona që i përkasin fisit Reçi. Pas marrjes në pyetje dhe deklarimeve të tyre, të gjithë janë lënë të lirë, pasi nuk janë evidentuar prova që t’i lidhin me vrasjen.Një prej vështirësive të hetimit lidhet me terrenin ku ndodhi krimi. Në hyrje të fshatit Ndërfushas ka kamera sigurie, por nga këqyrja e pamjeve nuk është evidentuar ndonjë automjet që të ketë kaluar në zonë gjatë orarit kur dyshohet se është kryer ekzekutimi. Një nga pistat që po verifikohet është mundësia që autorët të jenë larguar përmes autostradës, pasi dyshohet se mund të kenë kaluar në këmbë barrierat mbrojtëse të aksit rrugor, të cilat ndodhen vetëm pak metra larg vendit ku 65-vjeçari u zu në pritë. Edhe këqyrja e kamerave në pikat hyrëse dhe dalëse të Rrëshenit nuk ka sjellë deri tani një gjurmë të automjetit që dyshohet se është përdorur nga autorët. Rreth 20 minuta pas njoftimit të policisë nga familjarët e Viktor Bardhit, të cilët e gjetën atë të pajetë, një automjet u gjet i djegur në zonën e Munazit. Brenda tij nuk u gjetën armë apo prova të tjera që mund ta lidhnin drejtpërdrejt me vrasjen. Kjo rrethanë ka ngritur dyshime te hetuesit nëse automjeti i djegur është realisht mjeti i përdorur nga autorët apo nëse djegia e tij mund të jetë pjesë e një skenari për të larguar vëmendjen e policisë nga automjete të tjera që mund të kenë lëvizur në zonë në momentin e krimit. Një tjetër pistë që po verifikohet është mundësia që autorët të jenë ndihmuar nga persona të tjerë, të cilët mund t’i kenë pritur me një automjet pas ekzekutimit për t’i larguar nga zona dhe për të humbur gjurmët. Deri në këtë fazë, hetimet vijojnë në disa pista ku me kryesorja mbetet ajo e hakmarrjes