Rasti i dyshuar për helmimin e fëmijëve të grupit të dytë në Kopshtin Nr. 2 në qytetin e Korçës ka shqetësuar prindërit dhe komunitetin lokal. Sipas të dhënave pjesë e grupit janë rreth 20 fëmijë të moshës 4 -5 vjeç, nga të cilët 6 u trajtuan në spital dhe të tjerët shfaqën simptoma më të lehta duke u trajtuar në kusjte shtëpie. Koço Xexo, babai i një prej fëmijëve të prekur, ka treguar situatën kritike me të cilën u përball. Sipas tij, fëmija u mor nga kopshti prej familjarëve rreth orës 13:30. Fillimisht shfaqi vetëm shqetësime të lehta në bark, por pas një pushimi të shkurtër situata u përkeqësua me shpejtësi. Babai i fëmijës theksoi se ngjarja ka gjasa të jetë pasojë e pakujdesisë ose mungesës së kontrollit të mjaftueshëm. Prindërit kërkojnë zbardhjen e plotë të shkakut, rritjen e kontrolleve higjieno-sanitare dhe përgjegjësi më të lartë për mbrojtjen e shëndetit të fëmijëve. Ndërkohë policia procedoi penalisht për shpërdorim detyre mjeken e pediatrisë dhe drejtoreshën e kopshtit.