Pluhuri i bardhë që ishte dërguar në zyrën e kryeministrit të Belgjikës, Alexander De Croo, muajin nëntor, është konfirmuar se është helm. Bëhet fjalë për strikininë, që helm që mund të jetë fatal. Një anëtar i stafit të kryeministrit përfundoi në spital pasi kishte hapur letrën me pluhur të bardhë më 22 nëntor. Zyra e prokurorit në Bruksel shpjegoi natyrën e substancës që ishte dërguar nëntorin e kaluar në ndërtesat qeveritare, duke përfshirë edhe zyrën e kryeministrit. Letra ishte zbuluar më 22 nëntor në zyrën e kryeministrit, dy ditë pasi pako të ngjashme ishin gjetur edhe në zyrën e ministrit të Jashtëm belg, Anelis Verlinden dhe në zyrat qendrore të shërbimeve shtetërore të sigurisë. Një person tjetër ishte vendosur në karantinë si masë parandaluese. Striknina, një substancë e bardhë pa erë, që përdoret si helm për minj, te njerëzit ndikon duke shkaktuar spazma të muskujve, arrest kardiak, dështim të organeve dhe vdekje. Lajmet e letrës me helm dolën dy ditë pasi një burrë ishte arrestuar jashtë zyrës së kryeministrit belg në Bruksel, ndërsa në dorë kishte një thikë. Policia deklaroi se motivet e tij nuk ishin të qarta në fillim. Qeveria reagoi e shokuar dhe tha se të gjitha procedurat e sigurisë ishin ndjekur në mënyrë strikte.