Gjatë mbrëmjes janë riaktivizuar disa vatra të tjera zjarri në Dajt e Elbasan, ndërsa në total në 24 orët e fundit raportuar 34 vatra zjarri, 5 prej të cilave vijojnë të mbeten aktive dhe me rrezik përhapjeje për shkak të terrenit të vështirë shkëmbor. Për menaxhimin e situatës në të gjithë territorin janë angazhuar 219 forca operacionale dhe 35 automjete zjarrfikëse. Forcat e Armatosura kanë zbritur në terren me 60 efektivë, ndërsa mbështetja nga ajri po realizohet përmes një helikopteri dhe dy avionëve të specializuar Air Tractor. Fokusi kryesor i të gjitha strukturave emergjente mbetet në Malin e Dajtit në Tiranë. Vatrat atje vijojnë të jenë aktive pas disa riaktivizimeve të njëpasnjëshme në të dyja anët e kreshtës. Ndërhyrja nga ajri me helikopter dhe dy avionët Air Tractor ka qenë vendimtare për të mbajtur situatën nën kontroll, duke bërë që aktualisht të mos ketë asnjë rrezik për zonat e banuara përreth. Në qarkun e Dibrës, situata mbetet e vështirë në zonën e Ballenjë–Kostenjë, ku aktualisht po punohet në terren të thepisur, si dhe në Qafë të Helmës në Bulqizë, e cila po monitorohet në mënyrë të vazhdueshme. Nga ana tjetër, zjarret janë rikthyer edhe në qarkun e Elbasanit. Vatrat janë riaktivizuar në Malin e Dardhës në Librazhd dhe në Malin e Qukësit në Prrenjas. Në të dyja këto zona, efektivët e shërbimit zjarrfikës lokal po punojnë për izolimin e vatrave, ndërsa fatmirësisht raportohet se flakët janë larg shtëpive dhe nuk rrezikojnë qytetarët. Agjencia Kombëtare e Mbrojtjes Civilekonfirmon se po ndjek situatën hap pas hapi në koordinim të plotë me të gjitha prefekturat dhe bashkitë e vendit, duke mbajtur kapacitetet njerëzore dhe logjistike në gatishmëri të plotë për të ndërhyrë kudo ku situata mund të përkeqësohet.