Ngushtica e Hormuzit u rihap për lundrim, por situata mbetet ende larg normales. Irani dha dritën jeshile për kalimin e anijeve tregtare deri në fund të armëpushimit me SHBA, më 21 prill, ndërsa në terren po shihet një rifillim i kujdesshëm i trafikut. Gjatë së premtes rreth 20 anije kaluan nëpër ngushticë. Lëvizjet e para u panë menjëherë pas njoftimit, me transportuesin e gazit “G YMM” ndër të parët që kaloi. Nga Dubai, disa anije të tjera niswn rrugën drejt Hormuzit, ndërsa në zonë janw vënë re edhe anija turistike. Megjithatë, kjo nuk do të thotë se gjithçka po kthehet shpejt në normalitet. Dhjetëra anije vijojnë të jenë të bllokuara në Gjirin Persik, bëhet fjalë për rreth 50 cisterna nafte dhe 20 të gazit të lëngshëm. Dalja e tyre nuk pritet të jetë e menjëhershme. Arsyeja është e thjeshtë: rreziku nuk ka kaluar. Anijet që kalojnë pranë brigjeve iraniane mbeten nën vëzhgim, ndërsa në ujërat ndërkombëtare ekziston ende frika e minave detare. Kësaj i shtohet edhe kostoja e lartë e sigurimit, që i bën kompanitë më të kujdesshme për të rifilluar lundrimet. Ndërkohë, tregjet kanë reaguar menjëherë. Çmimi i naftës Brent ka rënë me rreth 10%, ndërsa nafta amerikane dhe gazi në Europë kanë shënuar gjithashtu ulje të ndjeshme. Sinjali është i qartë: tregu pret lehtësime. Megjithatë, ekspertët paralajmërojnë se rikthimi në normalitet do të jetë i ngadaltë edhe nëse negociatat shkojnë sipas skenarit më optimist dhe paqja të arrihet shpejt.