Armëpushimi në Lindjen e Mesme u arrit, por sfida e vërtetë tani është sa do të arrijë të mbajë vërtet, teksa shenjat e para të krisej, tashmë kanë nisur. Departamenti amerikan i Shtetit pohoi se ka “raporte të besueshme” që grupi islamik është duke planifikuar një sulm të menjëhershëm ndaj civilëve në Gazë, e nëse kjo ndodh vërtet, atëherë do të përbënte një shkelje të qartë “të pushimzjarrit”. “Ky sulm i planifikuar ndaj civilëve palestinezë do të përbënte shkelje të drejtpërdrejtë dhe të rëndë të marrëveshjes së armëpushimit dhe do të minonte përparimin e bërë përmes përpjekjeve për ndërmjetësim”, thuhet në deklaratën e DASH, ku theksohet gjithashti se “nëse Hamasi e ndërmerr këtë sulm, do të ketë masa për të mbrojtur banorët e Gazës dhe për të ruajtur integritetin e armëpushimit”, pa sqaruar se për cfarë masash bëhet fjalë saktësisht. Shefi i Shtëpisë së Bardhë Donald Trump ndërkohë, më herët gjatë javës kishte përcjellë për Hamasin një kërcënim të qartë. “Nuk ishte kështu marrëveshja. Nëse vazhdon me vrasjen e njerëzve në Gazë, ne nuk do të kemi zgjidhje tjetër përvese ti shkojmë atje e ti vrasim”, shkroi Trump në Truth Social. Hamasi vetë nuk e pranoi deklaratën e DASH-it dhe i cilësoi krejtësisht të rreme akuzat se po përgatit sulm ndaj civilëve në enklavë. Marrëveshja e paqes, e arritur mbi propozimin e Trumpit është e ndarë në fazë, dhe faza e parë prej tyre që po zbatohet tani e pa Izraelin t`i jepte fund ofensivës ushtarake në këmbim të lirimit të pengjeve që po mbaheshin atje që nga sulmi i Hamasit më 7 tetor 2023. Por me tërheqjen e ushtrisë së shtetit hebre, grupi radikal nisi riaktivizimin e tij në terren, duke forcuar kontrollin e vet me një fushatë shtypjeje e duke ekzekutuar rivalë e persona të cilët i akuzon si kolaboracionistë.