Hamasi ritheksoi se nuk do të çarmatoset nëse nuk krijohet një shtet sovran palestinez, duke ju përgjigjur kështu një prej kërkesave kryesore të Izraelit në bisedimet për një armëpushim në Gaza. Grupi i armatosur palestinez tha se po i përgjigjej deklaratave të të dërguarit të Presidentit amerikan Donald Trump për Lindjen e Mesme, Steve Ëitkoff, se Hamasi kishte "shprehur gatishmërinë" për të dorëzuar armët. Izraeli e konsideron çarmatosjen e Hamasit si një nga disa kushtet kryesore për çdo marrëveshje për t'i dhënë fund konfliktit. Negociatat indirekte midis Izraelit dhe Hamasit për të siguruar një armëpushim dhe lirimin e pengjeve ngecën javën e kaluar. Ditët e fundit, qeveritë e disa vendeve arabe i kanë kërkuar Hamasit të çarmatoset dhe të dorëzojë kontrollin e Gazës, pasi perëndimorët, përfshirë Francën dhe Kanadanë - njoftuan planet për të njohur shtetin e Palestinës. Mbretëria e Bashkuar tha se do ta bënte këtë nëse Izraeli nuk përmbushte disa kushte deri në shtator. Në një deklaratë, Hamasi tha se nuk mund të hiqte dorë nga e drejta për "rezistencë dhe armët" nëse nuk krijohej një "shtet palestinez i pavarur, plotësisht sovran me Jeruzalemin si kryeqytet". Nga ana tjetër gjenerali Eyal Zamir i Forcave Mbrojtëse të Izraelit (IDF) paralajmëroi se nuk do të ndërpriten aksionet në Gaza, nëse dështojnë negociatat për të siguruar lirimin e shpejtë të pengjeve që mbahen nga Hamasi.