Presidenti amerikan Joe Biden deklaron se është gati të urdhërojë forca shtesë ushtarake në Lindjen e Mesme pas sulmit të përgjakshëm të Hamasit ndaj Izraelit. Gjatë një fjalimi në Shtëpinë e Bardhë, Biden theksoi qartë se Shtetet e Bashkuara janë me Izraelin. Presidenti amerikan konfirmoi se mes viktimave në Izrael janë edhe 14 amerikanë, ndërsa akuzoi Hamasin se i ka duart të lyera me gjak. "Humbja e jetëve të pafajshme është zemërthyese. Si çdo komb në botë, Izraeli ka të drejtën të përgjigjet, me të vërtetë ka për detyrë t'u përgjigjet këtyre sulmeve të egra.", tha Biden Biden shton gjithashtu se ai ka një fjalë - "Mos" - për armikun afatgjatë Iranin, i cili mbështet Hamasin. "Këto mizori kanë qenë të neveritshme. Ne jemi me Izraelin, të mos gabojmë dhe jemi gati jemi gati të shtojmë trupa shtesë sipas nevojës”, shtoi presidenti amerikan Biden tregoi se kishte zhvilluar edhe një bisedë telefonike me kryeministrin izraelit Benjamin Netanyahu. "Kjo ishte telefonata e trerë gjatë së cilës e sigurova se përgjigja jonë do të jetë e shpejtë, vendimtare dhe dërrmuese. Ne diskutuam gjithashtu se si demokracitë si Izraeli dhe Shtetet e Bashkuara janë më të fortë dhe më të sigurt kur veprojmë sipas shtetit të së drejtës. Terroristët synojnë qëllimisht civilët, i vrasin ata. Ne mbështesim ligjin e luftës, ka një ndryshim mes nesh dhe atyre." Drejt Izraelit për tu koordinuar me qeverinë e tyre pritet të udhëtojë edhe Sekretari amerikan i Shtetit, Antony Blinken në ditët në vijim. Ndërkohë Kryeministri izraelit Benjamin Netanyahu po drejton një mbledhje të kabinetit të sigurisë në Tel Aviv për veprimet e mëtejshme. Izraeli tha se rimori zonat kufitare të Gazës nga militantët e Hamasit në ditën e katërt të luftimeve të ashpra që kanë lënë mijëra të vdekur nga të dyja palët që kur islamistët filluan një sulm të befasishëm. Pamjet: AFP