Ukraina sulmoi terminalin kryesor të naftës në portin e Shën Petersburgut, pohuan zyrtarët rusë të shtunën. Autoritetet e Shën Petërsburgut thanë se qyteti u vu nën një sulm të madh me dronë ukrainas dhe se mbrojtja ajrore rrëzoi 72 dronë. Ndërkohë, Presidenti ukrainas Volodymyr Zelenskyy konfirmoi sulmin ndaj infrastrukturës së naftës pranë qytetit të dytë më të madh të Rusisë. “Forcat Mbrojtëse të Ukrainës goditën infrastrukturën e naftës në port që gjeneron të ardhura për luftën e Rusisë, dhe pati gjithashtu sulme të suksesshme në një objektiv të rëndësishëm ushtarak. Distanca nga kufiri shtetëror i Ukrainës është më shumë se 850 kilometra”, tha Zelensky. Sulmi ukrainas erdhi pak orë pasi Rusia sulmoi me bombë qytetin verilindor të Sumyt, ku njëra prej bombave ra pranë një ndërtese banimi. Të paktën katër persona u vranë dhe dhjetëra të tjerë u plagosën. Pamjet nga terreni tregonin shkatërrime të mëdha në ndërtesën pesëkatëshe, ndërsa autoritetet ukrainase njoftuan se disa banorë mund të strehohen përkohësisht në konvikte lokale. Në mesin e viktimave u raportua se ishte edhe një fëmijë, ndërsa gjashtë fëmijë të tjerë, dy prej tyre në gjendje të rëndë, ishin në mesin e 27 të plagosurve. Sirenat e alarmit ajror vazhdonin të dëgjoheshin në Sumy edhe në mëngjesin e 4 korrikut, ndërsa kanalet lokale të monitorimit raportuan se forcat ruse kishin lëshuar dronë Shahed drejt qytetit, në kohën kur ekipet e emergjencës vazhdonin të pastronin rrënojat.