Rusia ka lëshuar urdhër-arrest për tre zyrtarë të Policisë së Kosovë dhe njëherësh ka përcjellë kërkesën edhe në INTERPOL. Mësohet se urdhëri për arrestimin e tyre është lëshuar për shkak të arrestimit të një shtetasi rus në vitin 2019 në veri të Kosovës. Rusia kërkon arrestimin e Arben Jetullahut ish-shef i Njësisë Speciale Intervenuese, Besart Ahmetit Njësisë Speciale Operative dhe një zyrtari tjetër. Policia e Kosovës në një aksion kundër korrupsionit dhe krimit të organizuar në veri të vendit më 28 maj të vitit 2019 kishte arrestuar 39 persona në mesin e të cilëve edhe një shtetas rus që punonte në misionin e UNMIK-ut. I njëjti është arrestuar për pengim të aksionit të zyrtarëve policor duke u dhënë ndihmë personave që kishin bllokuar rrugën për të ndaluar aksionin. Për shkak të imunitetit të tij diplomatik, shtetasi rus ishte liruar një ditë më vonë. Në këtë aksion për shkak të protestave të qytetarëve të veriut për të penguar arrestimet kishin mbetur dy policë të Kosovës të plagosur. Pamjet: AFP