Manovra ukrainase në rajonin e Kurskut është përpjekje për të shpërqendruar vëmendjen ndaj ofensivës së Moskës në rajonin e Donbasit, u shpreh tw hwnwn presidenti rus Vladimir Putin. Sipas tij, duke sulmuar rajonin e Kurskut në pjesën jugperëndimore të Rusisë, Kievi mbase ka bërë përpjekje të destabilizojë jetën e përditshme në Rusi, por ka dështuar. Ai tha se numri i vullnetarëve që i janë bashkuar ushtrisë ruse është rritur dhe u zotua se Rusia do t’i përmbushë synimet e saj ushtarake. “Humbjet në radhët e forcave të armatosura ukrainase po shtohen në mënyrë dramatike, përfshirë në mesin e njësive më të përgatitura për luftë, njësi që armiku po i dërgon në kufirin tonë”, deklaroi Putin gjatë një takimi me zyrtarët më të lartë të sigurisë dhe guvernatorët rajonalë. “Armiku gjithsesi se do të marrë një kundërpërgjigje të merituar dhe të gjitha objektivat tona, pa dyshim do të arrihen”, deklaroi Putin. Pjesa më e madhe e Rusisë ishte kryesisht e pandikuar nga pasojat e drejtpërdrejta të sulmit rus ndaj Ukrainës gjatë këtyre dy vitesh e gjysmë lufte, por të hënën zyrtarët rusë u bënë thirrje më shumë banorëve nga rajoni i Kurskut të evakuoheshin për shkak të “gjendjes shumë të tensionuar” në atë zonë. Autoritetet ruse të emergjencave thanë se mbi 100,000 banorë kanë braktisur shtëpitë e tyre pasi trupat ukrainase dhe automjetet e blinduara kaluan kufirin më 6 gusht, duke depërtuar rreth 30 kilometra në brendësi të Rusisë. Forcat ukrainase u futën me shpejtësi në qytetin Sudzha, rreth 10 kilometra përtej kufirit, pas sulmit. Sipas raporteve, ato ende vazhdojnë të mbajnë nën kontroll pjesën perëndimore të qytetit, që është zonë e rëndësishme kalimi e gazit natyror. Sulmi i Ukrainës në brendësi të Rusisë u dha goditje përpjekjeve të Putin për të pretenduar se jeta në Rusi ka mbetur pothuajse e pandikuar nga lufta. Propaganda shtetërore u mundua ta minimizojë sulmin, duke vënë në pah përpjekjet e autoriteteve për t’i ndihmuar banorët e rajonit dhe duke synuar të tërheqë vëmendjen nga dështimi i ushtrisë që të përgatitet për sulmin dhe për të zmbrapsur atë shpejt.