Një javë pas bombardimit në një nga rrugët më të ngarkuara të Stambollit, Turqia ka nisur sulme ajrore ndaj objektivave kurde në Irak dhe Siri. Sipas ministrisë së mbrojtjes turke këto sulme kanë goditur bazat kurde që po përdoreshin për të nisur sulme ndaj Turqisë. Me fillimin e sulmeve ajrore, ministria turke e mbrojtjes shkroi në Twitter se "ora e llogarisë" kishte ardhur, së bashku me një foto të një avioni luftarak që ngrihej dhe pamjet e një shpërthimi. Më vonë u pohua se sulmet ndaj bazave militante kurde në Sirinë veriore dhe Irakun verior shkatërruan 89 objektiva. Forcat e udhëhequra nga kurdët në Siri u zotuan të hakmerren dhe thanë se qyteti i Kobane u godit si dhe dy fshatra me popullsi të dendur. Të paktën 31 persona u vranë vetëm në Sirinë veriore, sipas Observatorit Sirian për të Drejtat e Njeriut me qendër në Mbretërinë e Bashkuar.