Dy tornado shkatërrimtare goditën njëra- pas tjetrës Wuhanin, duke lënë pas 12 të vdekur, 218 të plagosur e dëme të mëdha materiale në qytetin kinez ku i pati fillesat e saj pandemia e koronavirusit që gjunjëzoi botën. Të dhënat e para tregojnë se trombat e dhunshme të ajrit, të mbërritura në një distancë prej 90 minutash, shkulën pemët dhe shkatërruan makina e banesa, duke shembur ose dëmtuar shtëpitë e të paktën 147 familjeve. Erëra me fuqi më shume se 260 km në orë u përplasën mbi qytet, ku lanë gjithashtu me mijëra banesa pa energji elektrike. Forca e erës ishte e tillë sa lëvizi edhe dy vinca të mëdhenj në një kantier ndërtimi, njëri prej të cilëve u rrëzua duke shkaktuar mjaft dëme. Disa banorë të Wuhanit, të lindur e të rritur atje, thanë për agjensitë e huaja të lajmeve se nuk kishin parë kurrë një gjë të tillë, e madje shtojnë se kohët e fundit, episodet e dhunshme të motit duket sikur janë shtuar.