Pavarësisht sanksioneve ndërkombëtare dhe izolimit në rritje, Irani ruan ende aftësinë për të destabilizuar rëndë Lindjen e Mesme dhe për të ndikuar ekonominë globale, varësisht nga mënyra se si zgjedh të reagojë ndaj sulmit izraelit. Me mijëra raketat me rreze të mesme veprimi, Irani mund të godasë bazat ushtarake amerikane në rajon, si ato në Irak dhe në Katar. Sulmet mund të ndihmohen nga grupet e armatosura pro-iraniane në Irak dhe Jemen, duke e bërë të vështirë parandalimin e tyre dhe duke rrezikuar stabilitetin rajonal. Rajoni prodhon rreth 30% të naftës botërore. Siç ndodhi në vitin 2019, Irani mund të godasë objektiva në Arabinë Saudite, Emiratet e Bashkuara dhe Kuvajt, duke rrezikuar furnizimin global dhe duke shkaktuar një krizë energjetike. Ngushtica e Hormuzit, ku kalon një pjesë e madhe e naftës globale, mbetet një pikë e ndjeshme. Çdo përshkallëzim ushtarak mund të shkaktojë një krizë në transportin detar ndërkombëtar dhe të tronditë tregjet globale. Irani ka paralajmëruar se do të reagojë me forcë ndaj çdo sulmi ndaj objekteve të tij bërthamore. Përgjigjja mund të përfshijë raketa të drejtpërdrejta ndaj territorit izraelit, duke rritur rrezikun e një konflikti të gjerë. Edhe pse Hezbollah dhe Hamasi janë dobësuar, Irani ka ende aleatë të fuqishëm si Huthit në Jemen dhe milicitë në Irak, të cilët mund të godasin objektiva izraelite dhe amerikane, duke e zgjeruar konfliktin përtej kufijve të tij aktualë. Situata mbetet jashtëzakonisht e tensionuar dhe çdo hap i Iranit mund të ketë pasoja të gjera për sigurinë rajonale dhe stabilitetin global ekonomik.