Piku i valës së tretë të pandemisë së koronavirusit në Francë, “duket se është mbrapa nesh”, deklaroi kryeministri Jean Castex duke njoftuar se kufizimet në udhëtim do të lehtësohen në fillim të muajit tjetër. Ai u tha gazetarëve se është vënë re një “rënie e qarkullimit të virusit në 10 ditët e fundit”, duke konfirmuar se kufizimet që ua ndalojnë njerëzve lëvizjen më larg se 10 kilometra nga shtëpitë e tyre, do të hiqen më 3 maj. Aktualisht Franca është nën izolimin e saj të tretë.Masat e marra këtë herë konsiderohen sidoqoftë më të lehta në krahasim me karantinat në të kaluarën, pasi aktivitetet në ambiente të jashtme janë inkurajuar me qëllim të promovimit të shëndetit mendor. Shumica e dyqaneve jo të domosdoshme kanë qenë të mbyllura, ashtu sikurse baret, restorantet dhe qendrat kulturore. Castex sqaroi se “dyqanet, qendrat kulturore, aktivitetet sportive dhe hapësirat e jashtme të restoranteve” do të mund të rihapen “në mesin e muajit maj”, varësisht nga situata epidemiologjike. Ai shtoi qeveria mund të lejojë rihapjen në baza rajonale, ku virusi është më pak i përhapur.Ora policore, që nis nga ora 19:00, do të vazhdojë të zbatohet deri në një njoftim tjetër, tha shefi i ekzekutivit. Që prej shpërthimit të pandemisë, autoritetet franceze kanë regjistruar 102,164 vdekja nga Covid 19. Ndërkohë, mbi 13 milionë persona në Francë kanë marrë të paktën një dozë të vaksinës kundër koronavirës.