Vetëm pak orë pas marrjes së detyrës, kryeministri i ri i Britanisë së Madhe, Andy Burnham, u zotua se “do të rikthejë shpresë” te qytetarët. Ai zbuloi kabinetin e tij dhe tha se qeveria duhet të bëjë më të mirën për të sjellë ndryshime të vërteta për vendin, ndërsa premtoi një qasje të kujdesshme ndaj ekonomisë. Ai e nisi mandatin si kryeministër me emërimin e papritur të ish-Sekretarit britanik të Mbrojtjes, John Healey, si Kancelar të Thesarit. Healey, 66 vjeç, u largua nga qeveria e Keir Starmer muajin e kaluar, duke e kritikuar atë për mungesën e investimeve të mjaftueshme në ushtri. Ai deklaroi se vendi nuk ishte përgatitur sa duhet për sfidat e sigurisë në një botë gjithnjë e më të rrezikshme. Ndërkohë, Ed Miliband është emëruar Sekretar i Jashtëm në qeverinë e Andy Burnham. Miliband, ish-lider i Partisë Laburiste nga viti 2010 deri në vitin 2015 dhe ish-Sekretar i Energjisë në qeverinë e Keir Starmer, do të marrë përgjegjësinë për politikën e jashtme të vendit. Kryeministri i ri mban të pandryshuar postin e Sekretares së Brendshme, ku do të vijojë në këtë detyrë Shabana Mahmood, e njohur për qëndrimet e saj të forta ndaj çështjeve të emigracionit. Burnham premtoi një plan zhvillimi 10-vjeçar dhe njoftoi se masat për përballimin e kostos së jetesës do të prezantohen duke nisur nga e marta. Ai u zotua gjithashtu t’i japë fund fenomenit të gjumit në rrugë dhe të rrisë ndërtimin e banesave sociale, duke e cilësuar këtë periudhë si një “moment vendimtar për Britaninë”. Sipas zyrës së tij, Burnham zhvilloi edhe një bisedë telefonike me presidentin amerikan Donald Trump, të cilin e ftoi të vizitojë Mançesterin, ndërsa theksoi angazhimin e qeverisë britanike për mbrojtjen dhe sigurinë.