Gjykata e Durrësit caktoi masën e sigurisë arrest në burg për Majlind Habibin i cili akuzohet për vrasjen me dashje të fqinjit të tij Branko Shkoza më 2 dhjetor të këtij viti. Para gjyqtares Besjana Garxënaj, autori i dyshuar i krimit ka mbajtur një qëndrim mohues. Ai deklaruar se fillimisht e ka pranuar krimin dhe motivet e dobëta të tij i ndikuar nga presioni i policisë. Prokurori i çështjes, Sokol Nishani, deklaroi se hetimet ndaj Habibit nisën pas arrestimit të tij nga policia, që zbardhi ngjarjen e raportuar fillimisht si aksidentale. Nga hetimet rezultoi se për motive të dobëta, Habibi e ka kontaktuar viktimën dhe e ka shtyrë në kanalin pranë shtëpisë dhe më pas ia ka rrëfyer ngjarjen një personi tjetër I cili gjithashtu është marrë në pyetje nga grupi hetimor. Ndërkaq ekspertiza mjeko-ligjore ka përcaktuar se viktima ka vdekur nga mbytja në ujë, pasi në trupin e Shkozës nuk kishte shenja dhune. 35-vjeccari Habibi u shfaq i qetë në seancën për caktimin e masës së sigurisë ndaj tij deri në momentin që u pyet nga gjyqtarja për krimin të cilin e mohoi, duke deklaruar se për herë të fundit ka qëndruar në lokal me viktimën më 27 nëntor. Ai u shfaq i shqetësuar për gjendjen e familjes së tij, që është larguar nga banesa, duke thënë se ka një nënë të sëmurë dhe gruan shtatëzanë dhe djalin 4-vjecc, ndërsa i druhet faktit të një përplasjeje mes vëllezërve të viktimës dhe vëllait të tij. Mbrojtja e caktuar kryesisht nga gjykata dhe organi I akuzës mbajtën qëndrime të kundërta lidhur me provat dhe deklaratat e dhëna. Qëndrimin mohues të Habibit e ka kundërshtuar prokurori Nishani, i cili dorëzoi pranë gjykatës dhe një tjetër dëshmi kundër të arrestuarit. Ndonëse Habibi kërkoi drejtësi duke mohuar akuzën e vrasjes me dashje dhe avokati mbrojtës i tij i caktuar kryesisht nga gjykata kërkoi një masë sigurie më të butë, gjykata e la në paraburgim deri në fund të hetimeve.