Në një postim në rrjetin social “X” (ish-Twitter), të mërkurën, Yulia Navalnaya akuzoi drejtpërdrejt Kremlinin për vdekjen e bashkëshortit të saj, Alexei Navalny, duke thënë se analizat ndërkombëtare të mostrave biologjike nga trupi i tij tregojnë shenja helmimi. Yulia Navalnaya citon rezultatet e analizave nga laboratorë të huaj mbi prova biologjike të marra nga trupi i Navalny-t. Në videon që publikoi, Navalnaya, e cila akuzon Kremlin për vrasjen e bashkëshortit të saj, tregon se Alexei Navalny kërkoi ndihmë më 16 shkurt 2024 në orën 12:10, duke thënë se ndihej keq, me djegie në gjoks dhe stomak, dhe më pas filloi të villte. “Kërkoj që gjetjet të bëhen publike, në mënyrë që të dalë në dritë ‘e vërteta e pakëndshme’,” shtoi ajo, pa specifikuar se cili helm është përdorur. Hetuesit rusë që trajtuan rastin arritën në përfundimin në vitin 2024 se Navalny “vdiq nga një kombinim sëmundjesh”, një pretendim që gruaja e tij e mohon kategorikisht. Alexei Navalny, një nga figurat më të spikatura të opozitës në Rusi dhe një kritik i ashpër i presidentit Vladimir Putin, ndërroi jetë në rrethana të dyshimta në shkurt 2024 në një burg të sigurisë së lartë në Arktik. Vdekja e tij ka ngjallur reagime të forta ndërkombëtare dhe dyshime të thella për një helmim të mundshëm, të denoncuar publikisht nga bashkëshortja e tij, Yulia Navalnaya. Edhe në gusht të vitit 2020, Navalny u helmua rëndë me agjentin nervor “Novichok” dhe u trajtua në Gjermani, ku mbijetoi falë ndërhyrjes së shpejtë mjekësore. Raportet ndërkombëtare konfirmuan përdorimin e agjentit kimik të ndaluar, por Rusia mohoi çdo përfshirje. Pavarësisht rrezikut, ai u rikthye në Rusi në janar 2021, ku u arrestua menjëherë dhe u dënua me disa vite burg në kushte tepër të ashpra. Ai ndërroi jetë në vitin 2024, pas një helmimi. Alexei Navalny do të mbahet mend si një figurë e guximshme që sfidoi një regjim të fuqishëm, dhe si njeriu që pagoi çmimin më të lartë për të vërtetën. Vdekja e tij mbetet ende pa përgjigje dhe një pikë e nxehtë në marrëdhëniet mes Rusisë dhe Perëndimit.