Pas muajsh të tërë tensionesh të ashpra dhe deklaratash që tronditën diplomacinë europiane, SHBA-ja dhe Danimarka kanë gjetur një gjuhë të përbashkët për të ardhmen e Groenlandës. Presidenti amerikan Donald Trump konfirmoi arritjen e marrëveshjes përmes një postimi në platformën Truth Social, duke deklaruar se Danimarka do t'i japë SHBA-së "kontroll të përhershëm mbi sigurinë dhe të gjitha nevojat e tjera" në këtë territor gjysmë-autonom danez. Kryeministrja e Danimarkës, Mette Frederiksen, u shpreh e kënaqur për këtë perspektivë trepalëshe duke konfirmuar se firma zyrtare mbi dokument do të hidhet gjatë javës së ardhshme në Nju Jork, ku liderët botërorë mblidhen për në Asamblenë e përgjithshme. Ndonëse teksti zyrtar i marrëveshjes nuk është publikuar ende, Presidenti Trump zbuloi disa nga pikat më delikate të saj, të cilat ai i cilësoi si arritje "pa asnjë kosto për Shtetet e Bashkuara". Pakti përfshin një rregull të prerë ku asnjë kundërshtar gjeopolitik i SHBA-së referuar Kinës dhe Rusisë nuk mund të mbajë prani ushtarake apo të kryejë "investime të ndjeshme" në Groenlandë pa miratimin e Uashingtonit. Marrëveshja i jep ushtrisë amerikane mundësinë "për të bërë atë që është e nevojshme" për të siguruar dhe mbrojtur territorin. Aleanca e NATO-s ka reaguar menjëherë duke përshëndetur marrëveshjen. Një zëdhënës i aleancës deklaroi se ky pakt do të ndihmojë ndjeshëm në avancimin e sigurisë, stabilitetit dhe bashkëpunimit në këtë rajon jetësor dhe tejet të ndjeshëm të Arktikut.