Kryeministrja e Danimarkës, ka thyer heshtjen pas disa ditësh dhe i është përgjigjur Donald Trumpit pas deklaratës së tij për Groenlandën që shkaktoi furtunë. Mette Frederiksen, i ka thënë presidentit të zgjedhur amerikan se i takon Groenlandës që të vendosë vetë për të ardhmen e saj. Presidenti i zgjedhur i SHBA-së shkaktoi trazira në Kopenhagen dhe në kryeqytetin e Groenlandës javën e kaluar kur deklaroi se SHBA dëshironte të merrte ishullin e madh arktik, i cili është një territor autonom i Danimarkës. Ai nuk e përjashtoi edhe ndërhyrjen ushtarake mbi të dhe mbi Kanalin e Panamasë. Në një telefonatë 45-minutëshe të mërkurën, Frederiksen i ka thënë Trumpit se Danimarka është e përgatitur të rrisë përgjegjësinë e saj për sigurinë në Arktik. Ajo ka përsëritur edhe deklaratat e kryeministrit të Groenlandës, Myte Eje, i cili së fundmi ka deklaruar se Groenlanda nuk është në shitje. Trumpi nuk ka reaguar publikisht ndaj thirrjes. Sidoqoftë, ai ka ripostuar në llogarinë e tij TruthSocial një sondazh të vitit 2019, që tregonte se 68% e groenlandezëve mbështesin pavarësinë nga Danimarka. Gjatë mandatit të tij të parë si president, Trumpi pati thënë se donte të blinte Groenlandën. Asokohe Frederiksen e kishte quajtur propozimin "absurd", ndërsa më pas ai nw shenjw hakmarrjeje kishte anuluar papritur një udhëtim zyrtar në Danimarkë.