Presidenti i Shteteve të Bashkuara të Amerikës, Donald Trump, ka ashpërsuar tonet ndaj vendeve që nuk mbështesin planin e tij për marrjen nën kontroll të Groenlandës, duke paralajmëruar rritjen e tarifave ekonomike. “Nëse vendet nuk bien dakord me çështjen e Groenlandës, mund t’u vendos tarifa, sepse na duhet Groenlanda për sigurinë kombëtare”, deklaroi Trump gjatë një tryeze të rrumbullakët në Shtëpinë e Bardhë, duke e konsideruar ishullin strategjik për interesat amerikane. Pak orë pas këtyre deklaratave, dhjetëra ushtarakë zbarkuan në Nuuk, kryeqytetin e Groenlandës, të transportuar nga Danimarka. Dislokimi i trupave u konfirmua nga disa vende evropiane si pjesë e një misioni zbulimi në kuadër të një stërvitjeje të organizuar nga Danimarka me aleatët e NATO-s. Italia ka dalë hapur kundër dërgimit të trupave në Groenlandë, duke theksuar se zgjidhja e vetme për këtë çështje duhet të jetë “rruga e diplomacisë”. Danimarka ka hedhur poshtë kategorikisht idenë e Trumpit, duke theksuar se Groenlanda nuk është në shitje. Zyrtarët danezë dhe ata groenlandezë kanë ritheksuar se çdo vendim për të ardhmen e ishullit mund të merret vetëm nga banorët e tij.