Kur kanë kaluar 332 ditë nga nisja e luftës mes Izraelit dhe Hamasit, kryeministri Netanjahu u përball këtë të hënë me një grevë të përgjithshme, që pasoi protestat masive, me kërkesën për armëpushim dhe marrëveshje për kthimin e pengjeve të mbetur në Gaza. Sindikatat bënë thirrje për ndërprerjen e shërbimeve, ndërsa mijëra manifestues bllokuan rrugët në Tel Aviv pas gjetjes së trupave te gjashtë pengjeve në Gaza, mes të cilëve edhe një shtetas amerikan. Greva preku sektorët kryesorë të ekonomisë, përfshirë bankat, spitalet dhe aeroportin kryesor të vendit. Kjo është greva e parë e përgjithshme që nga sulmi i Hamasit më 7 tetor. Në demonstratat masive në mbarë vendin, protestuesit thonë se qeveria po saboton një marrëveshje për lirimin e pengjeve në favor të mbajtjes së një pranie ushtarake përgjatë kufirit Gazë-Egjipt. Sondazhet tregojnë se shumica e publikut izraelit mbështet një marrëveshje armëpushimi si e vetmja mënyrë për të liruar pengjet, edhe nëse kjo do të thotë se Hamasi nuk është shkatërruar plotësisht… Një nga negociatorët izraelit me Hamasin deklaroi se në Gaza janë ende 100 pengje. Sipas tij, trysnia ushtarake nuk mund t’i shpëtojë ata, përkundrazi do t’i çojë drejt vdekjes, ndaj e vetmja mënyrë është arritja e marrëveshjes.