Gjoba prej 392 milion euro që ka vendosur Komisioni Europian ndaj Greqisë për dështimin në menaxhimin e fondeve të BEpër bujqësinë dhe për kontroll të pamjaftueshëm në ndarjen e suvencioneve, nuk ishte një rrufe në qiell të pastër. Kishte disa muaj që disa media vendase trajtonin këtë çështje që po zbulohej dalëngadalë dhe partitë opozitare kërkonin të dinin se si ishin shfrytëzuar këto para të BE të keqmenaxhuara dhe të trajtuara në 6 vitet e fundit si subvencione të paligjshme. I ashtuquajturi skandali i agjencisë për menaxhimin e këtyre fondeve, OPEKEPE, vazhdon të trazojë vendin, pasi gjoba në fjalë , përfaqëson 78% të totalit të gjobave të vendosura ndaj të gjitha shteteve anëtare të Unionit! Dhe për më tepër në këtë gjobë nuk janë përfshirë subvencionet e viteve 2024 dhe 2025, për të cilat gjithashtu ka probleme me mënyrën e menaxhimit nga agjencia dhe ndoshta llogaria që do të duhet të paguajë qeveria , do të shkojë në gati 600 milion euro bëjnë me dije medat vendase. Duke parë se vendi i dytë me keqpërdorim fondesh, Portugalia, do të paguajë vetëm 35 ml euro dhe vendi i tretë më pak se 9 mln , bëhet e qartë se në Greqi ka pasur një abuzim të madh me fondet përmes agjencisë përgjegjëse . Skandali po merr përmasa gjithnjë e më të mëdha dhe po hetohet për kryerjen e pagesave pa kontrolle ose inspektime të mjaftueshme në terren, për mashtrimet në lidhje me fermat greke inekzistuese, apo dhjetëra raste ku qytetarët grekë kanë marrë fonde bujqësore të BE-së të destinuara për të zhvilluar kullota që nuk i zotëronin ose nuk i kishin marrë me qira, apo për aktivitete bujqësore në të cilat nuk ishin angazhuar kurrë. Në këtëmënyrë janë privuar nga këto subencione ata që kishin me të vërtetë nevojë. Një prej rasteve të bujshme ishte ai në Agrinio ku duket se janë keqpërdorur mbi 300.000 euro nga fondet europiane për 800 dynymë të ish- aeroportit ushtarak në këtë zonë që ishte deklaruar si tokë bujqësore. Ministria greke e Bujsëqisë sqaron se nuk bëhet fjalë për mashtrim nga fermerë vendas , por për shkak të pasaktësive në kontroll dhe zbatimit të mangët të rregulloreve evropiane, si dhe të problemeve të përhershme strukturore dhe mungesës së stafit. Qeveria greke ka deklaruar se do shpërbëjë agjencinë në fjalë e cila është nën hetim, duke i kaluar kontrollin e këtyre fondeve Misionit të Autoritetit të Pavarur për të Ardhurat Publike.