Greqia do tndihmojë edhe Bullgarinë në mbrojtjen antibalistike ndaj një kërcënimi të mundshëm nga Irani. Njoftimin e ka bërë ministri grek i Mbrojtjes, pas një bisede telefonike me homologun bullgar Atanas Zapryanov. Sipas vendimit të qeverisë greke, një bateri raketash Patriot do të zhvendoset në Greqinë veriore për të ofruar mbrojtje antibalistike për Bullgarinë. Gjithashtu, dy avionë luftarakë F-16 do të vendosen në një bazë ajrore në veri të vendit për të forcuar mbrojtjen ajrore të rajonit. Dy oficerë të lartë të Forcave Ajrore greke do të dërgohen në qendrën operative të ushtrisë bullgare në Sofje, ndërsa Dendias pritet të vizitojë gjithashtu Bullgarinë për bisedime me homologun e tij. Masat lidhen me zhvillimet e fundit në Iran dhe Lindjen e Mesme, ndërsa Athina thekson gatishmërinë për të kontribuar në sigurinë dhe stabilitetin në rajon. Ndërkohë ministria e Jashtme greke hodhi poshtë pretendimet e Turqisë për demilitarizimin e ishujve të Egjeut duke i cilësuar ato si të pabazuara, pas shqetësimeve të Ankarasë në dërgimin e raketave Patriot në ishullin Karpathos në kuadrin e zhvillimeve të fundit në Lindjen e Mesme. Sipas diplomacisë greke, mbrojtja e vendit është e panegociueshme, sidomos në një periudhë tensioni dhe pasigurie në rajon.