Ka disa ditë që banorët e qytetit të Volosit përballen me këto pamje të frikshme të peshqve të ngordhur në gjithë bregdetin që lag këtë zonë. Fenomeni i paprecedentë përveç pamjes dhe erës së keqe ka shkaktuar shqetësim pasi këta mijëra peshq të ngordhur janë një bombë shëndetësore për shëndetin publik siç theksojnë specialistët. Problemi po intensifikohet orë pas ore dhe organet kompetente po përpiqen të kontrollojnë çështjen, shkaku i së cilës thuhet se janë përmbytjet kolosale disa muaj më parë nga dy stuhitë që përfshinë zonën përreth, ndërsa kryebashkiaku i qytetit ka kritikuar qeverinë për menaxhimin e kësaj fatkeqësie natyrore. Achilleas Beos, kryebashkiak i Volosit: “Qyteti i Volos dhe Gjiri Pagasitikos po përballen me një fatkeqësi ekologjike, por ata që janë përgjegjës për këtë krim mjedisor kanë një emër”. Siç thonë ekspertët ndërkohë që mijëra tonë ujë nga liqeni Karla dhe përrenjtë e zonave përreth derdhen çdo ditë në gjirin Pagasitiko, bashkë me to derdhen edhe peshqit e ujit të ëmbël, të cilët ngordhin sapo bien në kontakt me ujin e kripur të detit. Është ajo katigori peshqish nga zona të përmbytura, ku ndërsa fushat po kullojnë dhe temperaturat rriten, zvogëlohet edhe vëllimi i ujit bashkë me oksigjenin. Ekipet e Bashkisë vetëm brenda dy ditëve kanë mbledhur mbi 57 ton peshq të ngordhur dhe kanë kërkuar edhe 7 anije të vogla për të pastruar gjithë gjirin në fjalë. Achilleas Beos, kryebashkiak i Volosit: “Që prej ditës së djeshme shërbimet e bashkisë së Volosit kanë nisur operacionin e pastrimit në frontin bregdetar, plazhet, shkëmbinjtë dhe kudo ku dalin peshq të ngordhur nga deti. Fenomeni ka shkaktuar ndërhyrjen e prokurorit , për të hetuar cilësinë e ujërave në gjirin Pagasitikos dhe shkaqet e mundshme të ngordhjes së peshkut në plazhet e Magnezisë,ndërsa rritet indinjata e bisneseve të qytetit që kanë reaguar për dëmet e mëdha që ka pësuar turzimi në këtë zonë që shquhet për bukuritë natyrore , ujërat e pastra dhe infrastrukturën turistike.