Tre zjarrfikës kanë humbur jetën në dy episode të ndryshme gjatë përballjes me flakët që vijojnë të përfshijnë Greqinë, ndërsa dhjetëra vatra mbeten ende jashtë kontrollit. Dy prej viktimave janë pjesëtarë të forcave zjarrfikëse në Kretë, të moshave 25 dhe 58 vjeç. Ata humbën jetën ku po luftonin me flakët në një territor të izoluar. Sipas autoriteteve, zjarrfikësit u rrethuan nga zjarri dhe nuk arritën të shpëtonin. Më vonë, policia gjeti automjetin e tyre tërësisht të djegur. Dy kolegë të tjerë mbetën të plagosur rëndë, por ndodhen jashtë rrezikut për jetën. Viktima e tretë u regjistrua në Peloponez, në zonën e Gjithios. Shefi 30-vjeçar i zyrës rajonale të zjarrfikësve në Lakoni ndërroi jetë pas një ataku kardiak, i shkaktuar nga lodhja dhe sforcimi ekstrem gjatë operacionit për shuarjen e flakëve. Zjarri në këtë zonë ka djegur prej më shumë se 24 orësh qindra hektarë sipërfaqe. Ndërkohë, beteja me zjarret vijon në disa rajone të vendit. Qindra zjarrfikës, të mbështetur edhe nga vullnetarë, po punojnë pa ndërprerje, por temperaturat që i afrohen 40 gradë Celsius dhe erërat e forta e bëjnë edhe më të vështirë kontrollin e situatës.